Nbwaachiwen APTN ji-waabndaman pii-mzinaateseg
Egiiwnaadizid dibishkoo Bizhiiw
Maanda dash shki-mdaaswi-shi-nswi minik aabito-dibagiisowaan mzinitaasechigan zhichigaans, gewii dash dibishkoo maanda gaa-ntami-zhichigaadeg pkinaagewin zhichigaans ‘Giigoonh Zaagijeying Nbiing Eyaad’ () zhiwe ‘Egiiwnaadizid dibishkoo Bizhiiw’ (Bizhiiw), nda-noopnanaanaa maaba getchi-towaa’iindaagozid Don Kelly miiniwaa eko-niizhing eshchiged maanda Dakota Hebert ezhi-gchi-zhiwebak maanda tkamiiwaad mompii akiing ni-shki-kendimoowaad Anishinaabe-nokiiwinan, maajiishkaachiganan, nokii-gamigoon miiniwaa bemaadizijig ezhi-mina-gishkiweziwaad nongo maanda mompii akiing pii-gigweji bimaadiziwaad wiinwaa makizinwaang, dash gewiinwaa gonda genowaabnjigejig ezhi-waabnjigewaad, gaawii go gegoo e-piichi-mchaag maage e-piichigaaching wiinwaa sa nji.
Pii-dash ni-zhitoon eni-bebkaanak zhichigewinan nooj ngoji: ezhi-minowaangizowaad Anishinaabek debendimoowaad shange-gamigoong, e-miiwsijig nokiiwinan, gchi-towaa gibeshii-gamigoon, bikwaakidoons enji-wepjigaadeg miiniwaa zhoontaage-gamigoong, e-naakimichigejig, emoonigejig, gwiiwnan e-zhinoomaagejig, anishinaabek enji-maanjiiwaad, ngamowinan enji-zhichigaadeg, mbaaschiganag pii-nash e-taagejig dibishkoo ezhooshkwaadejig, kwewag e-gediginaadijig miiniwaa bebaa-zhooshjiwejig, mnendaagizowin miiniwaa waa-zhi-mnendaagozing maanda sa nji zhichigaans naagwad nji-sa gonda Don miiniwaa Dakota ezhi-gigweji gwejtoowad gegoo ji-naadimaagwaad nsastaagewin minik eshchigeng wii-aawing Anishinaabe-nookiiwin/maajiishkaachigan miiniwaa /maage bemaadizid ezhigishkiwezid nongo akiing.
Eshchigejig maanda
DON KELLY
DAKOTA RAY HEBERT
Don Kelly aawi Gemini-gaa-nagmind wii-zhichiged, e-baapichitaagozid, e-zhibiiged miiniwaa e-mzinaateschiged.
Maaba dash e-naaniibwid e-baapzhitaagozid mompii kina ngoji gii-maanjiini akiing miiniwaa dash gii-mzinaatese nooj ngoji, dibishkoo wiin gaa-zhitood mzinaateschigewinan CBC miiniwaa CTV, gewii gii-zaagiiyetese Winnipeg Baapizhitaagoziwin Maawnjidowin, miiniwaa niibina-nching gii-zaagiiyetese zhiwe CBC The Debaters, Don gewii gii-zhichige APTN Mzowe Canada Anishinaabeg Giizhigad niibina nching, miiniwaa gewii gii-zhichige Canadian Aboriginal Music Miigwewinan, Anishinaabeg Gchi-mookmaan Ngamoowin Miiwewin miiniwaa dash go Anishinaabeg Bemaadizijig Nagmigewin Ngamoowin Miiwewinan “Ntam Naakshi Maawnjidiwin”.
Don gii-zhichige miiniwaa gii-zhibiige maanda sa nji Giigoonh Zaagijeying Nbiing Eyaad, gaa-mzinaateseg niiwing minik maanda eshseg ngobiboon zhiwe APTN. Maanda mzinaateschigan gii-nagimigaade ji-debnang wi Gemini (megwaa yaawing Canadian mzinaateschigan Miigwewinan) miiniwaa Don gii-nagimigaazo netaa zhichiged.
Don dibendaagozi Ojibways odi Onigaming, Treaty #3 Ntam Anishinaabeg Giiwedinong Ontario.
Dakota Ray Hebert gii-nji-ndaadizi miiniwaa gii-bi-koginaa odi Meadow Gamiing, Sasketchewan.
Ge-wii gii-maanjiini ezhi-maanjiining miiniwaa e-baapzhitaagozid mzowe mompii Canada miiniwaa Gchi-mookmaan-akiing, La Penita Mexico, gewii dash go Shenzhen China!
Gii-nsaakinamoowaan e-baapizhitaagozinjin dibishkoo Ryan McMahon, Kathleen Mcgee, Kelly Taylor, Derek Seguin, Dan Naturman, miiniwaa niibina go gwaya.
Gdaa-waabmaa Dakota Ray niibina doo-baapzhitaagiziwinan zhiwe waasmoni-nendimoowining, dibishkoo ‘Dakota Gwejtoon…’!
Aabideg ji-bshigendimaad Dengwe-mziniganing, Twitter, miiniwaa Instagram ji-noopinanaad maada Dene netaaw-nokiid.
Minik meznaatesegin
Minik meznaatesegin Bezhig
Lennox Minis Ntam Anishinaabeg Nbiing-miijim nokiiwinan
Don miiniwaa Dakota zhaawag shkweyaang ji-kendimoowaad nji-sa Lennox Minis Ntam Anishinaabeg ezhi-mina-gishkiweziwaad ji-nokiitamoowaad demink nindan nokiiwinan Anishinaabeg debendimoowaad dibishkoo Fishermen’s Pride miiniwaa wi Shellfish Hatchery.
Minik meznaatesegin Niizh
St. Mary’s Ntam Anishinaabeg Gchi-odaawe-gamig
Don miiniwaa Dakota wiijiiyewag nokiiwin ofi St. Mary’s Ntam Anishinaabeg Gchi-odaawe-gamig besha Fredricton, NB ji-kendimoowaad aaniish nji maanda nokiiwin enji-mina-maajiishkaamgok.
Minik meznaatesegin Nswi
Eugene’s Bikwaakwadoons enji-wepijigaadeg gchi-towaa-gibeshii-gamig miiniwaa zhoonyaataage-gamig
Don Miiniwaa Dakota kendaanaawaa njisa gete kinoomaage-gamig Anishinaabe-binoojiinyag gaanji-gnowendimindowaa gaa-zhi-aanseg nikeyaa Ntam Ansihinaabe debendang wenjishing miiniwaa enokii-chigaadeg Bikwaakwadoons enji-wepijigaadeg gchi-towaa-gibeshii-gamig miiniwaa zhoonyaataage-gamig odi Alberta gii-zhaawaad shkweyaang nokiiwining.
Minik meznaatesegin Niiwin
Flurer Smokery
Don miiniwaa Dakota gii-wiijiiwewag nokiiwin njisa Flurer Smokery odi Campbell Ziibi, BC ji-kendimoowaad aaniish maanda enji-mina-seg Mzowe Akiing miijim nooj ngoji ebideg wii-mina-bideg.
Minik meznaatesegin Naanan
Red Sky Performance
Don miiniwaa Dakota shkweyaang zhaawag maanda sa Red Sky Performance, yaawong nongo Anishinaabeg Emaanjiinjig Zhinoomaagewin odi Toronto, ON ji-kendimoowaad aaniish maanda maanjiinwin ezhi-gchi-gishkweziimgak waayaad emaanjiinjig nooj ngoji mompii akiing.
Minik meznaatesegin Ngodwaaswi
Pow Wow Café
Don miiniwaa Dakota shkweyaang zhaawag zhiwe Pow-wow Café ji-kendimoowaad aaniish maanda Anishinaabe shangegamig ezhi-gchi-mina-maajiishkaamgok paam-daawewaad menpogok Anishinabe miijim nji-sa Anishinaabeg odi Toronto, ON.
Minik meznaatesegin Niizhwaaswi
Ntam Anishinaabeg Gooning ezhooshjiwejig Maawmowizijig
Don miiniwaa Dakota gii-wiijiiwaa’aan debendaagozijig Ntam Anishinaabeg Gooning ezhooshjiwejig Maawmowizijig odi Vancouver, BC ji-kendimoowaad ezhi-maajiishkaamgok nokiiwaansan biidoowaad wenjishing nji-sa eshkiniigjig anishinaabeg mzowe mompii akiing.
Minik meznaatesegin Nshwaaswi
Salmon n’ Zaaasgokwaadenh
Don miiniwaa Dakota gii-wiijiiwaa’an enkiijig odi Salmon n’ Zaasgokwaadenh odi Vancouver, BC ji-kendimoowaad aaniish maanda getchi-shpendaagok Anishinaabeg debendimoowaad shangegamig ezhi-gchi-minawaagiziimgok.
Minik meznaatesegin Zhaangswi
Wasaya Airways
Don miiniwaa Dakota gii-wiijiiwaa’an enkiinjig nji-sa Anishinaabeg debendimoowaad Wasaya Airways ji-kendimoowaad aaniish maanda baasjigan nokiiwin enji-mina-maajiishkaamgok pii maashiwaad miiniwaa maajiidoowaad gegoo odi giiwedinong Ontario besha Nimkii Wiikwedoong, ON.
Minik meznaatesegin Mdaaswi
Windigo Catering
Don miiniwaa Dakota gii-wiijiiwaa’an enkiinjin nji-sa Windigo Catering odi GoldCorp Musselwhite Moonigan odi Giiwedinong Ontario nji-sa aaniish maanda nokiiwin enji-gchi-mina-nokiimgak
Minik meznaatesegin Mdaaswi-bezhig
Mushkegowak Gchi-towaa-nbegamig miiniwaa Zhoonyaa-taage-gamig
Don miiniwaa Dakota gii-wiijiiwaa’an enkiinjin nji-sa Ziibi-Mushkegowak Gchi-towaa-nbegamig miiniwaa Zhoonyaataage-gamik besha Edmonton, ji-kenjigaadeg aaniish maanda enji-gchi-mina-maajiishkaamgok.
Minik meznaatesegin Mdaaswi-shi-niizh
Native Delights
Don miiniwaa Dakota shkweyaang zhaawag njisa Native Delights miijim ji-kendimoowaad aaniish maanda Anishinaabeg debendimoowaad ezji-mina-maajiishkaamgok jiteg zhinoomaagewin odi Edmonton AB miijim ezhi-waabnjigaadeg.
Minik meznaatesegin Mdaaswi-shi-nswi
Canadian Forces Mkade Makwa zhichigan
Don miiniwaa Dakota gii-wiijiiwaa’an Canadian Force Mkade-makwa zhichigan debendaagozid Canadian Division Support Base (Gagetown) ji-nsastamoowaad aaniish maanda gchitowaa-zhichigan ezhi-mina-waangiziimgok nji-sa Anishinaabeg eshkiniigjig mzowe mompii Canada.
Etegin Mesnaatesegin Waasmoni-nendimoowining
Enji-zhinoomaading
Ezhi-ndikendimon ekendimon
Maaba ge-ginoonad
Giishpin ndowendimeg Don miiniwaa Dakota ji-ginoodimaagiig enji-nokiiyig, zhichigan maage ji-mzinaateshnowaad maage ji-niindaaweying gegoo wiindimaagewin, taga niindaawen waasmooni-boozibiigan: katery@interindigital.ca
‘E-giiwnaadizid dibishkoo Bizhiiw’ aawon gaa-zhitoojig InterINDigital Entertainment Inc., 100% Anishinaabe debendang Zhichigan Nokiiwin.